Sedertdien

Water! Water is lewe. Een van die heel lekkerste dinge op my skilder-spyskaart is om met 'n paletmes te verf en veral WATER. Daar is so baie moontlikhede. Hier is een van my kunswerke: die see iewers in ons mooi land, iewers in my verbeelding!

Sedertdien

Breek oor my soos branders

woel my wortels los,

word my stormseë

groei op my soos mos

Gooi my luike oop

brand 'n wierookkers

berei vir ons 'n ete

met note en met vers

Leef 'n lewe saam my

sing jou liefdeslied

koester al ons drome

niks is ooit verniet

Sluit nou oop my deure

trap jou spore vas

niks is meer dieselfde

as wat dit vroeër was

Elizabeth Kendall  ©

'n Nuwe speelding!

Kreatiewe joernaal......ja dis wat dit is! Hier gaan ek speel en rinkink met verfstreep en ink. Jy is baie welkom om saam te kom kuier en koekeloer. Kreatiwiteit is mos beter as 'n mieliepap-ontbyt. As ek die dag nie kreatief was nie, voel my lewe soos 'n dorsland met doodgaansiekte. Stilsit en niksdoen maak my bitter gou moeg, moedeloos en uitgeput.

Dis laatherfs. Vandag is die mooiste dag. Die son lê in blink strepe en lag op ons grasperk, die dorpsduiwe vlieg kraakvlerk verby en fladder sagkens neer by die waterbak. Ek hoor 'n lyster wat sy maat roep. So 'n mooi dag vol vrede maak my binnewerke week en sommer ook meer liefdevol teenoor die hond, my man en my naaste.