'n Heerlike uitstappie

Vandag skyn die son. Dis Dinsdag, die 18e Maart 2014 en ons gaan op 'n uitstappie. Hoe wonderlik dat die weer saamspeel. Die afgelope weke het ons so baie reën gehad. Natuurlik is ons dankbaar, maar ai, dis darem ook lekker om weer die son te aanskou! VLU Van Riebeecktak gaan vandag een van die bome van die jaar nl. die laventelboom, plant.  Bo ons koppe is die lug oop en skoon.

 Op die kerkterrein van NG Nooitgedacht is 'n netjiese gat gegrawe.

Yolande Steenkamp is die sameroeper van hierdie vergadering. Ons almal het dit terdeë geniet.

Heteropyxis natalensis is 'n lieflike boom om in  jou tuin te plant. Dit het 'n mooi vorm en voorkoms. Die bas is ook baie aantreklik. Dis 'n kleinerige, ornamentele boom. In kouer dele vertoon dit pragtig in die herfsseisoen voordat die blare afval. In warmer dele is die boom immergroen. Gekneusde blare en takkies ruik sterk na laventel. Heerlik!

Familie: Heteropyxidaceae  (Laventelboom familie) 

Waar kom die naam vandaan? Heteropyxis – van Grieks ‘heteros’, wat "verskillend" beteken en Latyn 'pyxis' wat 'n "bottel of deksel" beteken, verwysend na die vrugte wat verskil van die Mirtelfamilie. Natalensis – van Natal, nou KwaZulu-Natal.

Dit kan 4-8 meter hoog word en is omtrent 3-5 meter breed. Dit het eenvoudige blare met gladde rande, die blomme ruik soet en is geel-romerig van kleur. Wanneer dit begin kouer word, verander die blare se kleur is lieflike geel, bruin, rooi en pers kleure. Die vrugte is ovaalrond, klein en bars oop wanneer dit ryp is. Daar is vier saad-kompartemente binne-in. Die bas van jong stamme is bleek-bruin, glad en soms krummelrig. Op ou stamme is dit bleekgrys, bruin en het 'n pienkerige tot oranje ondertoon. Die aantreklike kollerige spatsels kleur van ouer stamme is 'n uitstaande kenmerk van die laventelboom. Die bas "skil" af en maak 'n pragtige vertoning. ('n kunstenaar se droomskildery!) 

(Elkeen van ons het 'n beurt gekry om 'n graaf grond in die gat te gooi. Lieflike ryk, rooi grond)

In ons tuine is die laventelboom beslis een van Suid-Afrika se aantreklikste kleiner boomsoorte. Dit vertoon pragtig in kleiner tuine. In groter tuine kan dit in groepe aangeplant word vir meer effek. Dis 'n baie goeie boom vir 'n wildlewe-vriendelike tuin, want dit lok insekte en voëls. In 'n groot pot geplant, maak dit ook 'n baie mooi vertoning. Die laventelboom is ook 'n gewilde bonsaiboom. Dit groei vinnig, tot een meter in 'n jaar. Dis maklik om te onderhou. Voed dit met organiese voeding of kompos en beskerm jong boompies teen koue. Dis rypbestand, maar moet beskerm word wanneer dit jonk is. Dit hou van vol son, maar sal ook gelukkig wees in gedeeltelike skadu. Skoenlappers hou van die blomme en voëls wat graag insekte vreet, word deur die laventelboom aangelok. 

(Luitha weet van bome plant!)
Dit het ook medisinale voordele: 'n heerlike tee kan van die blare gemaak word. Blare kan ook, wanneer tot 'n vloeistof gekook word, gebruik word om verkoues te voorkom. Die wortels en takkies se sap kan gebruik word om tandvleisontsteking en infeksies te beveg. Boombas word gebruik as teenmiddel vir impotensie.
Koedoes, duikers en swart renosters is baie lief om die blare te vreet. Die blomme lok bye, skoenlappers en ander insekte. Die hout is swaar, hard en sterk. Dit word meestal gebruik vir heiningpale. Blare word gebruik vir potpourie en parfuum.
(Marietjie weet van graaf hanteer! )

 

By Ezemvelo, naby Bronkhorstspruit, is daar heelwat laventelbome te sien. Dit word aangetref in KwaZulu Natal, Noordwes Provinsie, Gauteng, Mpumalanga en ook in Zimbabwe.
(Inligting deur my in Afrikaans vertaal, verkry vanaf Witkoppen Kwekery.)

(Niks beter as 'n netjiese paar crocs om die grond vas te trap nie!) 

En kyk nou net! 'n Laventelboom is geplant vir ons nageslag om te geniet. 
(Jolanda, Marietjie en Yolande)

Ons besoek aan Doulos

Op 15 November vertrek drie van Van Riebeecktak se lede  nl. Yolande Steenkamp, Jolanda Smit en ek self met sakke vol plastiek houers wat bakkies en bottels van enige kleur en grootte insluit, van Bronkhorstspruit af na Pretoria. Ons gaan dit aan Doulos, die armoedebediening in Waverley, aflewer. Dis deur die jaar bymekaargemaak deur VLU Van Riebeecktak se lede.

Daar aangekom, ontmoet ons Mnr. Hans Janse van Rensburg wat aan die hoof van hierdie baie geslaagde onderneming staan.

Hy  vertel ons wat hulle alles doen en hoe daar te werk gegaan word met al die verskillende skenkings. Doulos Gemeenskapsprojek is 'n geregistreerde nie-winsgewende organisasie wat deur 'n droom aangedryf word. “Ons wil diegene wat hulpeloos voel help om weer oor hulle toekoms te droom. Ons wil hulle begelei om hulle drome te leef en om doelwitte te stel en te bereik op die grondslag van liefde, eerlikheid, hardwerkendheid en verdraagsaamheid.”

(Doulos beteken dienskneg)

Jolanda Smit (Vlu Van Riebeeck se sekretaresse) by ‘n volgepakte rak in een van Doulos se vele stoorkamers. Etikette word van blikkieskos afgetrek sodat dit nie weer herverkoop kan word nie. Dit word dan ge-etiketteer en geskenk aan behoeftiges. Konfyt en ander nie-bederfbare kossoorte word in skoon bottels en bakkies gesit voordat dit uitgedeel word.

 

“Ons hier by Doulos het nie voor- of afkeure nie, nee hier doen ons wat ons hande vind om te doen elke oomblik elke dag en alles wat ons aanpak doen ons met oorgawe.”

 

Geskenkpakkies word opgemaak en aan kinderhuise, ouetehuise, kerke of waar ookal ‘n behoefte is, geskenk. Alles in so ‘n pakkie, is splinternuut. Doulos bedien verskeie nedersettings en is by vele projekte betrokke.

 

Enige-iets is welkom. Skenkings soos toiletware word in geskenkpakkies opgemaak en aan dames in tehuise of arm gemeenskappe geskenk. Netjiese, nuwe klere word aan gemeentes oral oor die land uitgedeel wat dit op hul beurt weer skenk aan minderbevoorregtes. Nie-bederfbare voedsel word uitgedeel waar nodig. Vars brood word aan arm mense in skuilings in en om Pretoria gegee.

Donasies is welkom. Dit kan inbetaal (gemerk “Blanke Armoede”) word by ABSA DERDEPOORT 9167030529 (Spaarrekening) Art. 18A Maatskappy (Reg no’s 053-086-NPO;RG/0009/10/06). U kan bewys van inbetaling stuur aan epos hans@diens.co.za. of skakel by 0832697082.

Op Doulos se webblad lees ek Hans se woorde: Ek kan die naaldwerksentrum in Codoniastraat 735, Waverley onmiddelik beskikbaar maak waar mense kan kom leer en werk. Die sentrum is pragtig ingerig, lekker koel en beskik oor alles wat nodig mag wees. Daar is baie materiaal wat gratis gebruik kan word en waar mense items kan maak vir hulself of om te verkoop as hulle wil. Hierdie geriewe sal ek alles gratis beskikbaar stel met net een voorwaarde en dit is dat daar behoorlike toesig moet wees. Daar is baie sakke met verskillende kleure en groottes lappe wat gebruik kan word. Verder is ek ook bereid om baie netjiese klere te verpak vir mense wat nie het nie binne gemeentes regoor die land. Ons maak die pakkie op, plaas dit met die persoon se versoeklysie, netjies getik binne-in die pakkie en verseël die pakkie met ‘n masjien sodat dit netjies vertoon en aanloklik is.

Ons drie is bevoorreg om dié naaldwerksentrum met eie oë te aanskou. Daar is een-en-twintig werkstasies. Mense word hier by Doulos opgelei (werkskepping) om hul talente te gebruik en hul passies uit te leef.

Ons bydrae lyk skielik soos ‘n druppel in die emmer. Tog is ons dankbaar dat ons iets kon gee. Ons voorneme vir die nuwe jaar is om baie meer by te dra. Vanoggend het ons iets begin verstaan van wat armoede is en wat gee beteken.

 

Voor ons vertrek skenk Doulos twaalf kartondose southappies wat ons aan Ons Herberg, die ouetehuis in Bronkhorstspruit, se inwoners kan gaan gee. Toe ons in tuis land, gaan laai ons dit af. Groot is die blydskap by die ontvangs daarvan!

 

Yolande Steenkamp, Jolanda Smit en Elizabeth Kendall.

 

Gee aan almal, gee omdat vir jou gegee word.

JOHANNES 6:35
Maar Jesus sê vir hulle: “Ek is die brood wat lewe gee. Wie na My toe kom, sal nooit weer honger kry nie, en wie in My glo, sal nooit weer dors kry nie.

Om meer te wete te kom van Doulos, besoek die webblad: http://www.armoedebediening.co.za/index.php/af.html