Friday 6 July 2012

Ek speel met vuur!

Een van die baie lekker dinge om in kuns te doen, is om te eksperimenteer....om iets te doen wat jy nog nooit voorheen gedoen het nie en dan met groot opgewondenheid die eindresultaat te geniet! In die kunsklas het ek jare gelede 'n interessante tegniek geleer. 'n Mens werk op hardbord. Jy beplan en bedink jou ontwerp /prentjie. Dan gebruik jy Bostik Clear gom en maak lyne daarmee.


Terwyl die gom nog nat is, steek jy dit aan die brand...ja regtig! Nou lyk dit so:


Laat toe dat die vlammetjies self blus. Trek meer lyne om jou prentjie te voltooi.


Steek weer aan die brand. Wees maar versigtig, veral as daar kinders by is. Hulle geniet dit baie, maar toesig is belangrik. Ek moet een van die dae dié tegniek vir 'n groep van 30 vroue demonstreer en leer. Dis deel van ons VLU se kompetisie-artikels: om iets te maak van Bostik Clear gom. Ek sien baie uit en ek glo almal sal dit geniet. Dis mos lekker om iets kreatiefs en maklik te maak!


Hier is die geverfde resultaat! Die gomstrepe het lieflike, growwe teksture en die kuiken lyk sommer baie gelukkig! Dié tekening is eenvoudig en maklik en sal verseker mooi lyk in 'n kinderkamer as dit geraam sou word.

Ek het voorheen al heelwat skilderye op dié manier voltooi. Hier is 'n paar voorbeelde:


Dié skilderye (daar is nog twee soortgelykes) is geraam en verkoop aan Omar Ehsan. Hy het dit vir sy dogtertjie present gegee op haar tiende verjaarsdag. Dis altyd so sielslekker om te weet 'n mens se werk bring vreugde aan ander mense!


'n Abstrakte blommetjie en sy maat....


Winterbome


Bg. hang in my dogter, Maureen Grobler, se huis...ek het 'n collage daarvan gemaak en kaartjies, afdrukke ens is te koop op RedBubble.

http://www.redbubble.com/people/happyart


In bg. skildery is slegs die boomstamme met gom gedoen.
Dié skildery is onlangs verkoop aan 'n digtersvriendin op facebook.

Nouja, mag elkeen wat hier lees inspirasie vind!



2 comments:

  1. Dit is so ontspannend om hier by jou in te loer en my te verlustig aan al jou skeppinge. Jou gom-brand-prentjies is baie interessant en dit spoor my aan om daarmee te eksperimenteer.

    Ek sien iets abstrak soos ʼn collage in my gedagtes; allerhande verskillende teksture - afgerond met jou mes waaroor ek so gaande is. (Oi die ouderdom, nou kan ek nie die naam onthou nie, is dit platmes?)

    Jou foto’s vul my met verwondering; dis al of die natuur vir ʼn oomblik stilstaan en wag dat jy die wonder daarvan op jou lens kan vasvang.

    ReplyDelete
    Replies
    1. Ek is so bly dat jy hier vir my 'n briefie laat staan het Mefri. Ek wonder dikwels wie lees my "stories" hier in die Joernaal. Dis so lekker om te kan deel en baie lekkerder om te weet iemand vind baat daarby en geniet dit. Baie dankie vir jou hartverblydende woorde! Jy spoor my sommer aan.

      Delete