Die bekoring van blomme

Ek het die voorreg gehad om 'n gerberaplaas te besoek, sommer net hier naby aan my tuisdorp.
Die plek se naam is Gerbera Galore. (inligting vanaf webblad)

"Ons kweek uitsluitlik gerberas en het die grootste verskeidenheid in Suid-Afrika. Madelief Kwekery was die algehele wenner van die 2006 Gardenex
snyblomkwaliteitskompetisie."

 

Gerberas is baie besonderse snyblomme vanweë hul verskeidenheid van helder kleure, hul vorm en lang vaasleeftyd. Ook bekend as die Barbertonse Madeliefie en inheems aan Suid Afrika, pas die gerbera in by alle mode- en dekorstyle. Die Europese kwekers wat die plante veredel kweek nog voortdurend nuwe en beter variëteite.

 

 

Die mooiste verskeidenheid kleure begroet ons!

 

 

Om jou gerbera’s so lank moontlik te laat hou:

• Koop vars blomme: die blomblare moet vars lyk en voel
• Gebruik min, maar skoon en vars water: net so 30 tot 50mm
• Sit ‘n knippie chloor by
• Sny elke vier dae die stele korter en vervang die water
• Hou die blomme op ‘n koel plek    

‘n Present vir my kind

Dis 'n liefie-kombers
met 'n vrolike vers
om jou in toe te vou
en teen jou vas te hou

Dis 'n lekkerleefding
wat jou hart sal laat spring
as jy gaan piekniek maak
en sagte stories droom
wat aan die sterre raak

As jy saans voor jou kaggelvuur sit
en vaak-gebedjies fluist'rend bid
vou jou dan toe in dié sag-kombers
(of steek maar aan 'n opsitkers!)

So snoesig en warm
soos 'n mamma se arm,
sal jy slaap en droom
so vaak en loom.

En as die winde woedend waai
en die hane veels te vroeg al kraai,
wikkel jou toe in dié liefieding:
jy het my nog net vreugde gebring!

Elizabeth Kendall ©